الفنان العالمي جمال مليكة يكتب: مواقف غريبة!!

من أطرف المواقف المستحيلة والغريبة وأحداثها فى حياتى:
1- اول لوحه رسمتها لابو الهول فى مدينه ميلانو حازت على اول ميداليه رئيس جمهوريه ايطاليا وحازت ايضا عل لقب ضمن احسن 50 فنان فى اوروبا وعلى اكبر جائزة ارتى للفنون فى اوروبا اكثر من 5000 متسابق
والاهم من كل ده انها ضمن مقتنياتى الخاصه
2- كنت اسمع عن الفنان الايطالى الشهير انطونيو بيدرتى كان بيجمعنا شهره كبيره فى اوروبا بالشو ارت. وكنت باتمنى فى يوم اشوفه واتعرف عليه شخصيا ،
فى يوم اتصل بيا بنفسه وطلب منى اننا نعمل دويتو والجميل اننا عملناه فى مدينه شرم الشيخ
3- قبل ماسافر ايطاليا شوفت تمثال للنحات الفرنسى اوجوست رودان ومن عشقى فيه اتمنيت انى فى يوم ازور متحفه واتصور جنب اعماله...سافرت اوروبا وعملت اكبر معرض فى تاريخى مع اكتر من 40 عمل من اعماله فى هاى هيل جاليرى فى لندن
4- كنت شغال فى مطعم متوسط الدخل وبقى من اشهر مطاعم المنطقه بعد مادخله رجل مسن غلبان وطلب رغيف عيش وانا اديته وجبة افطار.
والمطعم فلس بسببه برضو بعد ماصاحب المطعم طرده وقاله متجيش هنا تانى
5- بعربيه خاصه كان عندى ميعاد مع شخصيه مهمه فى الاسماعيليه وروحت بقميص احمر وجزمه حمره ومعرفتش انه الفريق مهاب مميش رئيس هيئه قناة السويس غير بعد مادخلت مكتبه
6- حد ايطالى متواضع جدا اشترى منى لوحه وانا طالب باكاديميه الفنون بميلانو ولما روحت اسلمهاله طلع جوڤيرناتور ( حاكم مقاطعة شمال إيطاليا ) شمال ايطاليا كلها
7- صاحب مصنع واين شهير وصاحب اكبر هوتيل فى ايطاليا عمللى حفله كبيره بصحافه وتليفزيون علشان يقدم انتاج المصنع لعام 1996 اللى كانت غلافه لوحه من لوحاتى ببساطه كان ملازمنى خطوه بخطوه من اول وصولى كنت فاكره السواق بتاعه ومعرفتش ان هو الا بعد مابدات الحفله
8- اول مسابقه فنون تشكيليه احضرها فى حياتى حصلت على الجائزه الاولى بعد ماوقفت ادام الجايزه ساعتين قبل النتيجه بقول يابخت اللى هيكسبها
9- روحت بلد تانيه خارج ميلانو استلف من واحد صاحبى عشره جنيه وكان معايا اتنين جنيه بس دفعت منهم جنيه تذكره رايح والجنيه التانى اديته لحد غلبان، وملقتش صاحبى.. ربنا عوضنى ولقيت عشره جنيه فى الارض مكان مكان واقف الراجل الغلبان
10- اول مره اسافر ايطاليا امى الله يرحمها حطتلى فى السر عشرين بيضه مسلوقه فى الشنطه ليله السفر وانا نايم لانى كنت رافض اخدهم ،عشنا بيهم انا وصاحبى عشر ايام واحنا مش لاقيين شغل
11- فى بدايه حياتى فى ايطاليا كنت شغال فى مطعم كان بياكل فيه لاعب التنس العالمى الشهير بوريس بوورج وكنت باتمنى انى اتشهر زيه بعد سنين واحد زبون اشترى منى لوحه وعزمنى على العشا فى نفس المطعم وطلبت وقعدت فى نفس المكان اللى كان بيقعد فيه بوورج
12- بعد ندم كبير على بيع لوحه من لوحاتى، بعد 30 سنه دخلت بيت مزاد مشهور فى ميلانو لقيت نفس اللوحه معروضه فى المزاد وشريتها باعلى سعر.
13- اول معرض فتحته فى مصر فى قصر عائشه فهمى وفتحه عالم الآثار الراحل كمال الملاخ وقاللى أن اعمالى بتفكره بأعمال مايكل انجلو فى كابيلا سيستينا كانت بشرة خير وكنت اول فنان من 550 سنه يدخل بيت مايكل انجلو ويهدى عمل بيرفورمامنزس وكان العمل الوحيد المعروض بجانب أعماله وفى بيته.