وقت الاندهاشات الحميمة

بعد الحزن، الكتابة بتِصفَى زَي الصلاة زَي امَّا تُمطُر سحابة تِغسِل جمال الحياة . حزينة انا من امبارح وقاعدة باكتب قصيدة قرَّبْت جدا فيها ولسه .. جدا .. بعيدة . واصلني ضيَّك هنا شئت انتَ والا أبِيت مين اللي يمنع قمر يوْصَل لأبعد بيت . يوسف جمالك سحَرني عيَّطت عَ الشبَّاك من يومها نومي هجرني وليلاتي باستناك . يا غيابك المؤلم يا وجودك الشارح ! مديت إدين قلبي وحضنتك امبارح . وانا لْعِنيك الجميلة لا أستطيعُ سبيلَا لو بس بصِّت في عيني واللهِ هاسقَط قتيلة ! . يا منتهى الرقة يا مبتدا بُكايا غنايا مالهوش معنى لو مش واصلْ لَك غنايا . ليه فيك حاجات مني وفيَّا منَّك حاجات ليه طعم صمتَك باحبُّه لمَّا يطول بالذات ؟ باحس فيه كده حاجة كما دمعتي المُهتاجة حاجة زي حيرِة عاشق حاجة زي وجع النايات . يا خمرِة التبليمة وقت اندهاشته الحميمة ولا ميت ديوان يوْصِفه الواد بتاع البنات !