فاكر ”قصيدة عامية ”

بقلم - احمد قنديل

كل شوية دموعي تنزل
اقول الله يرحمك ياغالي

أفكر واصرخ وأقول
فراقك تعبني أيام وليالي

أفضل أبص وأسرح
في حبة صور سبتهالي

اشوفك بتضحك قدامي
اقول هو ولا فيلم خيالي

يااااه بعدك ده افناني
تعالي وشوف اللي جرالي

الضحكة مش عارف أطلعها
والحزن يابوي ملازم ايامي

فاكر لما كنت اتنطط
وعصايتي توقع واتجبهالي

مين غيرك كان سندي
وعزوتي أيوه ورسمالي

وأول يوم في مدرستي
تقول أصغر واحد ف عيالي

بالليل تجرى تجيب كراستي
وقلم رصاص من ابو غالي

ياسلام على حتت كوتشي
من باتا ولاجزمه بكعب عالى

مريله ويدوب اغسل وشي
وشنطة قماش الحاجه عملتهالي

شوية شوية خلاص كبرنا
العمر عدى دقايق ويا ثواني

الناس كتير من حواليا
لكن من غيركم انا وحداني

بعد الحبايب مفيش أحباب
لا بقيت افرح ولاشيء يحلالي