المذيعة سمر محمد تكتب: استراحة محارب!!

أوقات كتير بنقف و نعطل و مايبقاش لينا مكان في العالم الواسع ده كله نروح ليه ..
بنقف كده و كأننا في صحرا ..
ولا قدامك و لا وراك و لا حواليك أي حاجه ولا أي حد ..
مابيقاش في حد يطبطب ولا يسند ولا حتى تعرف تقوله فيك إيه ..
ممكن يبقى حواليك ناس بس لوحدك ..
عشان مابتحبش تتقل و تحكي و لا تشكي عشان إنت عارف إن كل واحد فيه اللي مكفيه ...
الموضوع ده بتقابله الستات أكتر من الرجاله
لأنه معروف إن الستات بتفكر بصوت عالي و تعرف تعبر عن مشاعرها أكتر من الراجل ، و (( الصياح )) عندها إسلوب حياة
زائد إن الراجل يقدر بكل سهولة بعد شغله يطلع على قهوة أو قعدة مع صحاب و يفرغ شوية من مجهود اليوم و يشحن نفسه .
بس الست معندهاش المجال ل كده .
لو بتشتغل فهي بترجع البيت تكمل شغل مع الولاد و البيت و الأكل و الشرب و التنضيف و المذاكره و غيره .......... الخ
و لو لوحدها لأي ظرف (( زوج مسافر ، أرمله ، منفصلة ))
ف المسئولية مضروبة في اتنين لأنها هتكون أم و أب و ست وراجل في نفس الوقت ..
دماغها مش بتقف ..
بتبقى نجار و سباك و سواق و ماما و بابا و صحاب و اهل لأولادها ..
بيبقى الحمل تقيل ..
تقيل أوي ..
زي كده اللي بيروح چيم و يشيل أوزان تقيله جسمه مش مؤهل ليها ، متخيلين مدى الأذى الجسدي اللي بيحصله ..
هو ده حال كل حد حصله تبادل أدوار أو أصبح مجبر على دور مش دوره ..
و طباع و تصرفات و ردود أفعال عكس طبيعته ..

ف من كتر الضغوط و المسؤوليات و المشاكل اللي لازم نعترف إنها أوقات كتير بتبقى أكبر مننا لدرجة إن مخنا مش بيبطل تفكير حتى و إحنا نايمين ..
الحياة بتجبرنا نقع ، و كأنك اتكعبلت في زلطه صغيره و إنت مش واخد بالك قومت هوب وقعت و قعدت و مش قادر تقوم ..
و تعيط و تصعب عليك نفسك كمان ..
الناس تبقى شايفه إنها حاجه صغيرة ماتستدعيش تقع كده و تدي رد الفعل ده ..
لكن دي بتبقى واقعه بعد جري ساعات و أيام و شهور و سنين من غير ماتدي نفسك راحه ..
تقوم الحياة مدياك #إستراحة_محارب_إجبارية
لأنك حرفياً بتبقى خلاص اتمليت على الأخر و مصمم تمشي محمل كده ..
رغم إن ده مأثر عليك في طاقتك اللي قلت ..
و خلقك اللي بقى ضيق ..
و عصبيتك على اللي يستاهل و مايستاهلش ..
بس إنت عامل نفسك مش واخد بالك و مكمل عشان شايف إنك ماينفعش تقف و لا تقصر و كأن الدنيا هتتهد لو عملت كده ...
كلنا بنحتاج (( إستراحة المحارب ))
خلي بالك دي مش رفاهية
دي (( حباية الطاقة )) اللي بتخليك تقدر تكمل
و كل واحد عارف هو بيحب إيه و بطل يعمله بحجة إن مافيش وقت
و كل واحد عارف هوايته إيه و نسيها في وسط زحمة المسؤوليات و حجة إن غيره أولى
و كتيييييييييير بقى
إرجعوا تاني إعملوا الحاجات اللي بتحبوها
إرجعوا بصوا لنفسكوا في المرايا
إرجعوا حبوا نفسكوا و دلعوها
ده مش أنانيه منكوا
ولا عدم إحترام لمسؤولياتكوا
ولا تقصير في حق الناس اللي في رقبتكوا
بالعكس ..
إنتوا هتعملوا كده عشان تقدروا تشوفوهم و تكملوا معاهم و انتوا مرتاحين
تتعاملوا من غير ضغوط زيادة
و قبل كمان مايجي عليكوا الوقت اللي تقولوا فيه
ياريتنا ..
(( لنفسك عليك حق ))