أحمد طه يكتب : تحذير هام

هم المسئولين فى البلد ساكتين على اللى حدث لجمهور الزمالك بعد المباراه فى الاسماعيليه

ليه ؟الامن واتحاد الكره (لانى مش معترف برابط الانديه ) والنادى الاسماعيلى حاطين دماغهم فى الميه البارده ليه ؟

يا جماعه اللى حصل فى الاسماعيليه حدث مثله فى بورسعيد من 12 سنه وراح فيه 74 ضحيه لكن الله سلم هذه المره على جمهور الزمالك لان الشغب حدث فى الشارع اثناء ركوب السيارات ولم يغلق عليهم باب الملعب كما حدث مع جمهور الاهلى.

اين اعضاء مجلس النواب ولم يقدم اى منهم استجواب لوزير الداخليه او الشباب..هو عشان مفيش ضحايا يبقى الواقعه تمر مرور الكرام ويتم التعتيم عليها..لا ..ان معظم النيران من مستصغر الشرر.

اصحوا الاخوان الكلاب كانوا وراء مجزرة بورسعيد. فمن وراء جريمة الاسماعيليه ؟!!

● شعار الزمالك الابيض مثل علم مصر ومن يحاول طمس هذا الشعار# او التنكر منه فهو خاين .
اقول ذلك لانه ايام مرتضى كنا نرفض محاولة تغيير شعار الزمالك للون الأزرق.. وامس شاهدنا فريق الزمالك للكره الطائره يرتدى فانلات زرقاء فى مباراته ضد الطلائع دون داع لان مباريات الطائره ليس فيها التحام تقتضى تغيير الزى..اذن من المسئول عن ذلك..مدرب الفريق ام اللاعبين ام مدير النشاط الرياضى ..ام اللهو الخفى وظهر من جديد.
الحكايه ليست بسيطه وبلاش تعقدها ..لا الحكايه جامده ووراءها هدف ولابد من التحقيق ومجازاة المتسبب لان فانلة الزمالك البيضاء فى قلب وعين كل عشاقه.

●الحكايه ان اتحاد الكره عين محمد يوسف مدربا للمنتخب ووقع العقد وكتب الشرط الجزائي وبعد يوم واحد اقاله وعين حسام حسن بدلا منه فتمسك يوسف بالشرط الجزائي دون ان يعمل..فاتحاد الكره عزبه وبينفق من اموال الانديه الغلابه ..وطبعا احتاس ورفض صرف الشرط الجزائي وارتكب كارثه اكبر بتعيين يوسف مساعدا للمدير الفنى للاتحاد علاء نبيل عشان لا يحصل على الشرط الجزائي ويحصل على مرتب أعلى لعدة سنوات جالسا فى شمس حديقة اتحاد الكره.
وزير الشباب والرقابه الاداريه .. هو اتحاد الكره لقيط ومالوش اب يحاسبه ؟!