قصيدة مال علينا الزمن ”شعر عامية”

مال علينا الزمان
واحنا اللي منا اتكسر الجناح
طرح الشجر بقي غالي
والتمر زي الدمع
حضنه وجع وجراح
يا حلمي اللي راح
قلبي موجوع
مشتاق للافراح
يرقص ف يوم ويغني كمان
يحضن تراب الدرب الحزين
ويرسم بكرة
ولدي وبنتي
تبقي حياتي انتي
وانتي الفرحة والامان
ولسه كمان
غناوي كتيرة خايفة م الصباح
خايفة ولادها تروح
ما ترجع
خايفة تعلي صرختها بالوجع
ما حد يسمع
خايفة زفة العروسة ف دخلتها
تبقي وجع
خايفة نهر الحزن يغرق البيوت
والفرحة تموت
قبل ما تفرح بالنجاح
يا زمن كداب
مرشوش بويه جاية م الصين
حلمي الحزين
راح من سنين
وادينا مستنين
طلعة طير يغني
يرش وجعنا فرحة
ويجيب الشمس ف احضانا
والقمر يفرش ع القلوب حنين
ادينا بنستنا
دنيا غير كدبكم
والطمع
والوحش اللي فيكم
دنيا اللي فيها حب وحنان
احنا طول العمر غلابة
والليل ف حضنه مفتاحنا وراحتنا
عمرنا ما شفنا اكتر من تحت كعوبنا
ويمكن دا عيبنا
لما سيبنا للكدابين بيتنا
السيرك يا خال كبير تعبنا
والفرجة تمنها احزان
ومرمطة ملفوفة ف فوطة
مولود لساه بيتنفس ريحة المصالح
واحنا لسانا معاكي يا دنيا
بنتصالح
ونقدم ليكي تذاكرنا المختومة بالذل
وننحني كيف العصاية العوجة
ونطبطب علي فرحك
والحزن جوانا غرق الكل
ياللي انتي عايشنا ولا تعرفي قرصة برد
احنا ادينا بنبوس ايديك
ونقلك طول عمرك ست الكل
ايه يعني نلاقي المسامير مغروسة ف رجلينا
وايه يعني ما هو بايدينا
وكلامنا قلنا الزفت ما هوش زفت
دا فل
وكمان
انتي عروسة
خدودك تقوليش صبية علي وش جواز
تقولش قمرة ونسمة مرسومة ع القزاز
واحنا يا دوب سمك
ف سوق يشتري الرخيص قبل العزاز
انتي الحلاوة اللي تشفها الناس
اما احنا بس يدوبك برواز