سمية صالح تكتب: عشرة عمري الطيبة

لما أقلك يا عشرة عمري الطيبة..
يعني أنت أنا..
أسامينا أتلضمت في السما..
القسمة اللي كتبها ربنا..
أحلى نصيب وصُحبة الهنا..
يعني أول لخبطة..
أول ضحكة وأول غُنا..
أول ميعاد والقلوب متشوقه..
كوباية شاي على قهوة بلدي..
و القعدة أخر سلطنة..
تمشيه ع الكورنيش وسميط ودُقة..
مع أزُوزة ساقعه متلجه..
مسكة أيد متبته..
والصوابع متشبكه..
خدي الجاكيت الدنيا شتا..
أنا دفايا دقات قلبنا..
وخلي بالك أنتي بتاعتي أنا..
بحوش المهر والشبكة..
وهأخدك يا حلوة..
يعني أول وردة أتخبت جوه الكتاب..
وعاشت سنة ورا سنة..
كل ما أشمها الأقي الروح سارحه..
أول هدية عيد ميلاد..
اتحوشت من مصروف سنة..
أول فانوس رمضان، ووحوي يا وحوي..
اتغنت على دقات قلبنا..
والسنة الجيه بيت يضمنا..
وعود إتكتبت ببراءة روحين..
واتمضت بدقات طيبة..
أحلام طولنا بيها السما..
يعني ما فيش كدب ولا خوف ولا تمتمه..
كل اللي جوانا بنقوله بصدق وثقة ماليه قلبنا..
أمان يسكُنك ودفا..
وتبقى واثق عمره ما هيفرط في حبنا..
حيطة تتسند عليها بعد ربنا..
يعني بَعْرفك من صُوتك..
قوليلي زعلانة ليه ؟!
هو ينفع تخبي عليا أنا !!
ده أنا بعرفك لما تبقى فرحانة وماليه الدنيا دندنة..
حافظ كل تفاصيلك والبحة والخنقة..
ولما وشك يقفل وإنتي بتكلميني وتقولي إنما..
اوعاكي تخبي وجعك عني أنا..
يعني كبرتي جوه بيتي..
لما حد جه عليكي فيا اتحميتي..
أمانة عاهدت أبوكي أحافظ عليكي..
أشتريتك مهما بعتي ليا ونسيتي..
سترتك من عيون الناس..
و بكل ما فيا أتغطيتي..
اجيلك من أخر الدنيا..
لو احتجتي ليا وناديتي ..
يعني أنا في ضهرك..
اوعاكي تحسي بكسرة..
إيدي في إيديكي..
يعني دمعتك ما عليا تهون..
اقلب الدنيا ولا تباتي زعلانه في يوم..
يعني ذكريات بالكوم..
أول خلفة ودقة هون..
واسمعي كلام أبوكي يا بت..
تهشيكة وننه هوووو..
طيرتي من عينينا النوم..
كل سنة فيها يوم فرحنا..
ودمع الفرح ملأ العيون..
هتفضلي غالية واشيل معاكي الهموم..
أنتي ست الناس والكل بعدك ما له لزوم..
لو ملأ شعرك الشيب وراح الجمال..
ولو أنحني القد المزيون..
هشوفك أجمل صبايا الكون..
افديكي بالروح..
وفاكرك منين ما أكون..
حبك في قلبي النهاردة..
زي ما كان أول يوم..
ازعلي، اتعصبي أو حتى اضربي..
هخدك جوه قلبي وليكي أصون..
بنت قلبي وعمري..
وعُمر العشرة ما عليا تهون..