عبلة كامل : أنا سليمه وصحتي جيدة .. الحمد لله ”مش تعبانه خالص”

كتب: خالد الشربيني

كشفت الاعلامية لميس الحديدي عن مفاجأة حيث تلقت إتصالاً وصفته بأنه أجمل الاتصالا ت التي تلقتها مؤخراً وهو من الفنانة القديرة عبلة كامل قائلة " عندي حكايه و رساله يوم الأربع اللي فات جالي تلفون ، يمكن من اجمل التلفونات اللي جاتلي مؤخرا..الو لميس انا عبله .. انا عبله كامل.
وتابعت الحديدي عبر برنامجها " كلمة أخيرة " المذاع على شاشة " ON" قائلة "عاوزه أحكيلكم، عن مشاعري ،تقريبا قمت نطيت، عرفت صوتها في ثانيه و دي اول مره تكلمني فيها . انا ليا أصدقاء كتير من الوسط لكن دي اول مره الاستاذه عبله تكلمني فيها".
واردفت قائلة " يوم الثلاث كنت باتكلم عن عبله ، و بعتلها رساله من هنا قلتلها أنا بحبك ، و قلت أنه من القسوه جدا نشر خبر عن مرضها و أنها حتي لو كانت مريضه فهي اختارت الصمت و لازم نحترم صمتها، بعدين تم تكذيب الخبر لاحقا من أسرتها زوجها السابق و بنتها زينب ، وواضح إن رسالتي وصلتها"
وحول محتوى المكالمة قالت الحديدي "طيب قالتلي ايه؟ ..فيه حاجات هاقدر أحكيها و حاجات مش هاقدر أحكيها ، بناء عن طلبها.. لكن اللي اقدر أقوله من مكالمه تقريبا ٤٥ ق ، انها قالتلي بالنص: أنا سليمه و صحتي كويسه الحمد لله، مش تعبانه خالص و انا باقول بالنص لأَنِّي بصراحه كنت حريصه علي كلامها بدقه، وهي صوتها فعلا كان كويس"
وكشفت الحديدي أن الفنانة عبلة كامل كانت سعيد بمشاعر الحب التي تلقتها من الجمهور ثائلة " قالت لي انا فرحانه جدا بحب الناس اللي شفته لدرجه انها ساعات ماببقاش مصدقه ان الناس بتحبني كده ، عمري ما كنت أتصور أني محبوبه كده من الجمهور” ، قلتلها ازاي يعني، انت أكيد عارفه و شوفتي حتي لما اتعاد في جلباب ابي الناس كأنها بتشوفه لأول مره. قالتلي بجد انا عمري ماتخيلت حب الناس كده، انا إنسانه عاديه ، يمكن الناس بتحب أدواري بس عمري ماتخيلت كل الحب. ده.".
وقالت الحديدي أن إحدى صديقات عبلة كامل قالت لها " واحده صاحبتها قالتلها يا بنت المحظوظة خبر وحش عنك خلاكي تشوفي كل الحب ذه".
وقالت الحديدي أنها طلبت من الفنانة القديرة الخروج للجمهور وطمأنتهم عليها قائلة " طب يا عبله اطلعي طمني الناس اطلعي اتكلمي،ليه قافله علي نفسك ؟ لترد عليها كامل قائلة " انا بأحب امثل بس، و قالت اهم جمله : ماباعرفش اعمل عبله ، بعرف امثل بس. فضلت شويه أحاول افهم الجمله “ماباعرفش اعمل عبله” ، بس الجمله واضحه هي ممثله علي الشاشه ، لكن في الحقيقه هي إنسانه و ام عاديه جدا ، مش عاوزه تبذل مجهود تاني علشان تظهر او تتكلم او تتصور وده مجهود ، الأضواء مجهود( ده تفسيري انا مش كلامها) مابتعرفش تعمل عبله".
وسألتها الحديدي في معرض المكالمة التي أجرتها الفنانة القديرة بها عن إعتزالها ومدى صحته فردت كامل قائلة " لا طبعا ، انا بأحب التمثيل جدا، و لو جالي دور حلو أكيد ح اشتغله ، بالعكس انا شوفت مسلسلات رمضان اللي فات و لقيت فيها حاجات كتير جميله جدا و متنوعه ، لكن مافيهاش دور. يناسبني ، و اختارت كلمه “يستفزني”. يعني يستفز رغبتها في التمثيل. و قالت بالنص انا مستنيه دور حلو".
ووجهت الحديدي رسالة للمنتجين والكتاب قائلة " دي رساله لكل المنتجين و الكتاب: عبله كامل منتظره دور حلو".
وحول مشاعرها من كاتب الخبر حول إصابتها بالسرطان كشفت الحديدي أن الفنانة القديرة عبلة كامل لم تكن غاضبة وأنها ردت قائلة " لا انا مَش زعلانه انا مسامحه كل الناس و باقول للي كتب الخبر شكرًا انك وريتني حب الناس".
وأكملت الحديدي في سرد مشاعرها عندما تلقت مكالمة الفنانة القديرة قائلة "
كلام كتير ، و حكايات كتيره ، و مشاعر حب غمرتني بيها و أسرتني بيها الحقيقه".
لكن الحديدي عادت وأكدت أن رسالة عبلة كامل للجمهور هي " انا متشكره لكل واحد بعتلي رساله حب، لكل واحد دعي لي ، لكل حد نفسه يشوفني، و متشكره للي كتب الخبر لانه وراني حب الناس اللي يمكن ماكنتش ح اشوفه".
وأتمت الحديدي قائلة " المكالمة إنتهت و مره تانيه و انا عارفه ان اللي كتب الخبر يمكن ماكانش عاوز يضايقها قد ماكان عاوز ينشر خبر شايف انه مهم .. لكن مره تانيه من حق الشخصيه العامه اننا نحترم جزء من خصوصياتها، من حق الانسان ان يختفي، انه مايجريش حوارات، انه ما يتصورش".
وأكدت الحديدي أن عبله كامل ليست شخصية متعالية ثائلة " مش متعاليه ،مش مغرورة بالعكس، دي متواضعة بزيادة ، يمكن حد في مكانها يملاه الغرور و ألانا، بس هي لا. هي اختارت الصمت.. نحترمه. و ده مش معناه ان اللي بيظهروا غلط، بس كل إنسان و قدرته ، خلينا نحاول نرحم بعض و نحترم بعض، و مره تانيه حتي لو هي او أي حد تاني كان مريض و بيخلي مرضه، ده من حقه، خلونا رحماء ببعض و بلاش قسوه".
وإختتمت الحديدي حديثها قائلة " مدام عبله انا وصلت الرساله ، وارجع أقولك انا بحبك و كل الجمهور بيحبك و بيحترمك