الكاتب منصور البحيري يكتب: حكاية كيس الفول

السابعة صباحاً، تخرج "رقية" من بيتها البسيط في قرية نزلة المشارقة بإهناسيا. طالبة في أولى ثانوي، وأبوها "ربيع" أخصائي اجتماعي بالتربية والتعليم هيطلع معاش يوليو 2026. معاها 30 جنيه مصروف يوم كامل، نصهم مواصلات لحد مدرسة إهناسيا الثانوية بنات، لأن قريتها مفيهاش مدرسة ثانوي.

ترجع البيت الساعة 5 المغرب بعد الدروس. 10 ساعات بره. الحل؟ أمها تعملها كيس فول ورغيفين عيش تحطهم في درج الديسك. لقمة تسند طول اليوم.

الخميس الماضي دخل د. محمود الفولي وكيل وزارة التربية والتعليم ببني سويف فصل رقية في جولة مفاجئة. لمح الدرج. طلب من المديرة تفتحه وتطلع اللي فيه قدام كل البنات.

المشهد اللي فجر الغضب:
"إيه الفول ده؟ حد بياكل فول في الفصل؟ هتغمسي إزاي؟ أكيد في الفسحة"، قالها وكيل الوزارة. ثم أمر بـ"تحريز" كيس الفول والرغيفين واعتبارها واقعة تستدعي مذكرة رسمية. ووجه توبيخاً حاداً للأخصائي الاجتماعي قدام الطالبات وهدده بالتحقيق.

رقية نزلت راسها. الدموع نزلت. سكتت. روحت البيت منهارة نفسياً ورفضت تروح المدرسة تاني يوم. أبوها قال جملة واحدة: "فوضت أمري لله". خاف يتكلم عشان شغله.

السوشيال ميديا ولعت.
صور كيس الفول بقت تريند. الناس شافتها إهانة لبنت غلبانة بتاكل من بيتها. هاشتاج #كيس_فول_ورغيفين تصدر. أولياء الأمور سألوا: "هي اللقمة النضيفة بقت جريمة؟".

*رد التعليم الرسمي* جاء سريعاً: "الموضوع اتفسر غلط". وكيل الوزارة أكد أن الكلام كان "توعية صحية" بعد تعرض 3 طالبات لوعكة صحية من أكل غير صالح. الهدف كان التحذير من الإندومي والشيبسي، والتشديد على أهمية الأكل البيتي. "كرامة الطلاب خط أحمر"، قالها بالنص.

لكن الكلام لوحده مكنش كفاية.

صباح الأحد، د. الفولي راح المدرسة بنفسه. وقف في الطابور واعتذر لـ"رقية" قدام كل زميلاتها. دخل الفصل واعتذر تاني. قعد مع أبوها في مكتب المدير واعتذر تالت. قالها: "أنا بعتبرك زي بنتي".

سألها: "نفسك تطلعي إيه؟"
ردت وعينيها بتلمع لأول مرة: *"نفسي أكون ضابطة شرطة"*.
وعدها يدعمها.

أبوها قال والفرحة راجعة لصوته: "اللقاء ده رد لنا كرامتنا. إحنا أسرة بسيطة وبنتي متفوقة. الاعتذار ده غالي عندنا".

*الدرس؟*
بين "الانضباط" و"جبر الخاطر" خيط رفيع. أحياناً كيس فول بيكشف مسافة بين المسؤول والغلابة. وبين "التوعية" و"التجريح" كلمة. لكن الشجاعة الحقيقية إنك ترجع تعتذر قدام الكل.

رقية رجعت مدرستها. ضهرها مفرود. وفي درج الديسك، لسه كيس الفول ورغيفين. بس المرة دي، بكرامة.