”عاش البطل ” قصيدة عامية

بقلم- أحمد قنديل

أكتوبر ياأعظم الأمجاد
يا بصمة فى عمر السنين

قصة بطلها سي أنور
وراه قاده وجنود بالملايين

بعد الهزيمة وإللى كان
الشعب نزل ف الميادين

الكل نازل ينادي ع الزعيم
إحنا معاك ياجمال المصريين

إرجع معاك شعب جسور
غنت سومه وصوتها حزين

إنت الناصر والمنصور
أملنا تشفى قهر المجروحين

بدأنا نحفر ونبني خنادق
ندور ع السلاح مش لاقيين

قررنا نحارب بشوية بنادق
فضلنا نضرب شمال ويمين

ساعتها إرادة الشعب إنتصرت
لما وصلنا إيلات وكسرنا العين

كل الحواجز قدمنا إنكسرت
بدأنا ناخد تار سبعة وستين

مات جمال والحزن ساد
أرض الفيروز وطور سينين

وجه بعده البطل السادات
إللي قال على سيناء رايحين

ولا ننسى دورك يامبارك
والطلعة اللي قلبت الموازين

والجندي اللي فضل يتعارك
مع النابالم وبرليف الحصين

فضيحة ياديان ف عز نهارك
هدية مصر تلاته وسبعين

دكينا غرورك واستكبارك
جولدا قالت عملوها الفراعين

الكل وقف هنى وبارك
سيناء رجعت كاملة يامحتلين

وعاد الوطن يضم الوطن
عاد يحضن أم الشهيد بحنين

عاش البطل عاش البطل
اللى ضحي ولو ف الطين