الكاتبة شهد البرلسي: إحساسك إيه؟!!

إحساسك إيه لما توعد حد بإنك حتشاركه نعمه ربنا أنعم عليك بيها ولو بجزء بسيط منها وتخلف وعدك لأى ظروف حتى لو كانت قهريه
تعرف ان ربنا مبارك ليك فى صحتك وحياتك وبيحل ليك مشاكلك بسبب حد ممكن تكون فرحته بمساعدتك ليه بأى شكل تعرف ان مشاكلك كلها ممكن تكون واقفه على خطوه تاخدها تفرح بيها حد ربنا جعلك سبب لفرحته وجعل رزقه عن طريقك
اكيد كلنا عارفين الكلام ده بس للأسف فى البعض مننا مش بيعمل بيه أو أهملناه وسط المسؤوليات اللى شايلينها وحاسين اننا مش ينفع نفكرغير فيها وبس
وبسبب التفكير ده فى أطفال مش قادره تفرح زى غيرها بدخول العيد عليهم عشان للأسف أهلهم مش قادرين يوفروا ليهم اللى يفرحهم زى باقى الأطفال اللى فى عمرهم
مش قدروا يستمتعوا بأكله بسيطه فى شهر كريم إمتنع فيه أصحاب القلوب الكبيره عن مساعدة القلوب الصغيره دى ولو مره واحده بس تحسسهم ان ليهم حق فى انهم ياكلوا ويشربوا ويلبسوا عادى زى باقى الناس
دموع كتير نزلت من عيون اب وأم مقهورين مش قادرين يجيبوا لأطفالهم وجبه بسيطه أو لبس جديد يفرحهم ويسترهم وسط أصحابهم
إحنا علينا مسؤوليه كبيره أوى للأسف غافلين عنها متمثله فى كلمه واحده بس ( الرحمه ) اللى بنطلبها من ربنا ومش بنفكر فى اللى محتاجها مننا
بقينا بنفكر فى نفسنا اكتر ما بنفكر فى اليوم اللى مش حينفعنا فيه غير عملنا واللى عملناه لنفسنا فى اليوم اللى ربنا مش حيحاسبنا على أكلنا وشربنا ولبسنا قد ما حيحاسبنا على غفلتنا واهمالنا لشؤون عباده اللى وكلنا عشان نكون سبب فى تنفيذ إرادته لسترهم بينا
طولت عليكم انا عارفه بس حقيقى غصب عنى من اللى شوفته وسمعته من قهرة ناس مش قادره تفرح اطفالها ولا تلاقى علاج لحالتها ولا تلاقى حد يساعدها فى إيجار مسكنها اللى مهدده تسيبه فى اى وقت وتبقى فى الشارع فى اى وقت وفى ايام كريمه زى دى
مش حلوم حد وعد واخلف وعده بمساعدتهم او قال كلمتين ان ليه غرض بيهم تانى غير المساعده الله يسهل للجميع احوالهم
ربنا وحده اللى عالم بالنفوس و الضماير وقادر يهديهم لحالهم
لكن بجد بتمنى من اى حد شايف نفسه قد كلمته وقادر يساعد الناس دى ويدخل الفرحه فى قلوبهم بأى شكل سواء مره واحده او بشكل دايم يتحرك قبل الحال يوصل بيهم لأسوأ من كده ومش يبقى عندهم حتى سكن يسترهم
انا بتكلم عن أسرة البنت اللى اتكلمت عنها فى منشور من سنتين واتحرك لمساعدتهم شخص واحد بس مره واحده ربنا يجازيه كل خير ومن وقتها ومش فى اى حد اهتم بيهم ولا قدم ليهم اى مساعده ولا فكر يلتزم بوعد وعده بمساعدتهم حتى اللى اتواصلوا معايا وطلبوا بياناتهم
الأسره دى محتاجه مساعدات كتير طبيه وماديه اتمنى من اللى لسه فى قلبه رحمه يحاول يساعدهم بالشكل اللى يناسبه ويكون سبب فى دخول الفرحه فى قلوبهم فى الأيام الكريمه دى
وأى دكتور مخ واعصاب حابب يساعد فى عملية الست اللى اتكلمت عنها يتواصل معايا وربنا يقدرنا جميعاً على فعل الخير اللى راجع لينا فى الأخر