الثلاثاء 4 أكتوبر 2022 10:55 مـ
النهار نيوز
  • جريدة النهار نيوز
  • جريدة النهار نيوز
  • جريدة النهار نيوز

رئيس مجلس الإدارة د. يحيى عبد القادر عبد الله

رئيس التحرير جودة أبو النور

المقالات

م. محمد طاهر يكتب: تحدي.. ونجاح.. ووفاء

المهندس محمد طاهر
المهندس محمد طاهر

أجمل لحظة إنسانية في حياتي موجودة في الصور دي، مع أستاذي ومعلمي، مدرس الرياضيات اللي فضلت أدور عليه سنين، وأخيراً شفته بعد ٣٠ سنة، الأستاذ اللي بسبب تشجيعه ليا في إبتدائي عشقت الأرقام والحساب والهندسة، الأستاذ اللي قال للكل أنا بتحدي بمحمد طاهر أي حد في الرياضيات، فكان لازم يعرف إن أسلوبه وتحفيزه ليا وصلني بفضل الله إني ببني دلوقتي إتنين من أكبر ناطحات السحاب في افريقيا علي أرض العاصمة الإدارية الجديدة..
الحكاية بدأت من مدرسة قرية منشأة عبد الرحمن بالمنصورة، تلميذ أي حد يسأله عاوز تطلع ايه لما تكبر ؟!.. يرد بسرعة يقول : هكون مهندس ..كنت مصدق حلمى جدا رغم الناس اللى حاولت تشكك فيه خصوصا لما أجيب درجة وحشة أحيانا، إلا هو .. شخص واحد كان مؤمن بيا، كان بيقف في وسط المدرسة ويقولهم كلهم :" محمد طاهر ده .. أشطر واحد في الحساب في المنصورة كلها "..
أستاذى الأستاذ "عثمان عبد المحسن قنديل" اللى علمنى يعنى إيه أرقام وحسابات ورياضيات، وفتحلي أول باب الشغف بعالم الهندسة والتصميمات من صغري، والأهم إنه إتحدى بيا الكل، عشان كده هو أول واحد بييجي في بالى لما باخد خطوة كبيرة ناحية تحقيق حلمي، وبقي كل تفكيري ازاي أردله الجميل ؟!
30 سنة غيروا تفاصيل كتير وملامح بلاد وقرى وناس، بس كان لازم ألاقى الأستاذ عثمان مهما كلفنى الأمر، وبالفعل وصلتله وشرفني أستاذ عثمان في مقر شركتي، أول ما شوفته شوفت معاه كل لحظات مشواري، مشاعر مش قادر أوصفها، دموع ، شكر، عرفان، تكريم ،وفاء ورد جميل..
الفرحة اللي شوفتها في عيون أستاذي هي نفس الفرحة اللي كنت بشوفها في عيونه من ٣٠ سنة وهو بيقولي شاطر يامحمد، هتبقي مهندس كبير إن شاء الله، عشان كده كان لازم أرد الجميل بكل الطرق، وأولها إني قررت أسمى أول دور في "نايل بيزنس سيتي تاور" أكبر مدينة رأسية في إفريقيا اللي بتبنيها شركتي "النيل للتطوير العقارى"، باسم أستاذي الأستاذ عثمان عبد المحسن قنديل، عشان كل ما أشوف الإسم ده، وكل ما حد يشوف الإسم ده ، يعرف إن الوفاء فضيلة هتفضل عايشة ليوم الدين، وعشان تبقى القصة دى نموذج نعرف منه إن كلمة تشجيع واحدة ممكن تكون طريق للسحاب، وإيمانك بشخص، هو أول طريق نجاحه ..
كمان سلمت أستاذي الجليل درع التميز أهم درع في شركة النيل، وعشان مؤمن بأهمية دور المدرس في حياتنا، قررت أعمل منحة للمدرس المثالي علي مستوي محافظة الدقهلية بالتعاون مع نقابة المعلمين تكريما وتقديرا لدور أستاذ عثمان ودور كل معلم ماشي علي نفس المنهج..
شكرا أستاذى .. شكرا أستاذ عثمان عبد المحسن قنديل أعظم مدرس حساب ورياضيات في الدنيا، شكرا على إيمانك بيا، ويارب تكون دلوقتي فخور بتلميذك محمد طاهر …

472ff373fc628e30daf0a30a5b48b3c6.jpg
c5f32c1a59e98c97dd1eff6cf993749b.jpg
e70024a5b051c49b8b4dd0104c213175.jpg
f0220e83ef93932ef0e98860a301b48f.jpg
#محمد طاهر