حبة صور ”قصيدة عامية”

بقلم-أحمد قنديل

• 
  كل شوية دموعي تنزل !

• أقول الله يرحم الغوالي

• 
  أفكر وأصرخ وأقول

• فراقكم تعبني أيام وليالي

• 
  أفضل أبص وأسرح !

• في حبة صور سبتوهالي

• 
  أشوفكم بتضحكوا قدامي !

• أقول هما ولا ده فيلم خيالي؟

• 
  يااااه بعدكم ده أفناني

• تعالوا بصوا وانظروا حالي

• 
  الضحكة مش عارف أطلعها

• والحزن يابوي مرافق أحوالي

• 
  فاكرين لما كنت أتنطط

• وعصايتي توقع وتجبوهالي

• 
  مين غيركم كان سندي

• وعزوتي ديما وكان رسمالي

• 
  وأول يوم في مدرستي

• يقول أصغر واحد ف عيالي

• 
  بالليل يجرى يجيب كراستي

• وقلم رصاص زين من الغالي

• ياسلااام على حتت كوتشي

• من باتا ولاجزمه بلاستيك بكعب عالى

• 
  مريله ويدوب أغسل وشي

• وشنطة قماش الحاجه عملتهالي

• 
  شوية شوية خلاص كبرنا

• والعمر عدى دقايق ويا ثواني

• 
  الناس كتير من حواليا

• لكن من غيركم أنا وحداني

• 
  بعد الحبايب مفيش أحباب

• لا بقيت أفرح ولاشيء يحلالي

• 
  هو صحيح إنتو بقيتوا تراب؟

• ولا أنا تايه في وسط أوهامي

• 
  إيه الحكاية مفيش أحلام

• يعني خلاص مش هشوفكم تاني

• 
  طب يلا خلاص عليكم السلام

• هروح أدور علي طبيب لأحزاني

• 
  أديني لفيت ودورت زين

• مفيش طبيب ولا عيادة قبلاني

• 
  يبقي لازم أصبر على أمر الله

• وأكتم جوايا وأخبي كل ألآمي