محمد قنديل عشق التصوير الفوتوغرافي وبدأ التألق فيه

الكلمات عندما صبح غير واضحة سنركز على الصورة والتصوير.. حقيقة خفية لدرجة أنها تصبح أكثر واقعية من الواقع، فالتصوير هو وسيلة للشعور باللمس والمحبة ويوجد شخصان دائما في في كل صورة وهما :المصور والمشهد.

محمد قنديل شاب عشق التصوير منذ الصغير ، وذلك بعد لمسه لكاميراة احد أقرباه بالصدفة .

في بداية عرفنا بنفسك؟

اسمي محمد صابر قنديل شهير بلقب "فنديل" ، ابلغ من العمر 17 عام بدرس في الصف الثالث الثانوي ، من بسيون التابعة لطنطا .

منذ متي وانت علي دراية بامتلاكك هذه الموهبة ،وكيف اخذت الخطوة للدخول في عالم التصوير ؟

وانا ف تانيه اعدادي كان ابن خالتي بيصور وعلشان بنعتبر بعضنا اخوات فطلبت منه اخد الكاميراه اجرب التصوير واكتشف ازاي استخدمها، وبالفعل اخدتها منه وصورت ،و لقيت الناس اتبسسط من الصور اللي صورتها ، ف قولت ان خلاص بقا الكار دا بتاعي فاللي هو كنت لسه شبه صغير وكنت عقلية تانيه اعدادي فقولت انه التصوير دا كاري بنفس اللفظ كدا ،وبعدها ف نفس اليوم روحت كتبت ع الحيطة عندي ف الاوضة فوتوغرافر وقولت انه لازم في يوم هجيب كاميرا واحقق حلمي وابقي فوتوغرافر بجد ،ومن الموقف دا وانا وكل اللي حواليا ف البيت عرفوا اني لو اخدت الخطوة ف التعلم هبقي شاطر ،والحمدلله اخدت الخطوة ولسه مستمر ف اي اوصل للي بحلم بيه .

- نري انك صغير العمر فكيف خطوت تلك الخطوات لتطور من قدراتك ؟

قولت انه لازم اشتغل علي نفسي وفعلا اشتغلت علي نفسي وعافرت كتير وبقيت اسافر ، و بقيت بتعرف على ناس جديدة ومختلفة علشان اعرف اطلع الشغل اللي انا عايزه ، لان ف بلدي فكرة التصوير محدودة ،و انا عايز اكبر اسمي فلازم اطلع برا البلد بتاعي علشان ابقي ظاهر ويبقي ليا اسم كبير ان شاء الله .

وكمان علشان اجيب كاميرا قولت لنفسي لازم يكون معايا فلوس علشان اجيبها لنفسي و وانا ف تانيه اعدادي كنت بحوش من مصروفي ومصروف اكلي ولبسي علشان أحقق حلمي وانا بحب اجيب أخرى ف الحاجه اللي بحبها حوشت مبلغ كبير ساعتها وابويا لما لقاني حابب الموضوع وقف جمبي ، بس كان بيقول انت لسه صغير ، بس انا كنت عايز اثبت لنفسي ولأهلي ان ممكن أحقق اللي انا عاوزه رغم صغر سني ،وكمان رغم ان في ثانوية عامة السنادي و وخلاص امتحاناتي كمان شهر بس لحد دلوقتي بعافر والله وبشتغل على نفسي ف التصوير وفي الدراسة علشان ربنا يكرمني باللي بتمناه .

- هل كان هناك بعض اشخاص جعلوك تكمل خطواتك في عالم التصوير ؟

اه اهلي واصحابي القريبين مني والناس اللي بتحبني بيدعموني دايما ،ومعايا علطول وكمان في منهم اللي بيسافر معايا رغم انهم من سني وعندهم دراسة ثانوية عامة بردو ، بس هما شايفين اني بعمل اللي عليا علشان اوصل لحلمي علشان كدا بيساندوني وبيتمنولي الخير ، وحقيقي بقولهم من قلبي شكرا.

-شايف مين مثلك الاعلي في مجال التصوير ونفسك تحترف الموهبه لحد لما توصل لمستواه ؟

بحب تصوير ابو طالب جدا، ونفسي اوصل للمستوى بتاعه وكلمته قبل كدا من باب التشجيع لنفسي وقالي ركز على نفسك واشتغل كتير وهتوصل باذن الله .

-كلمنا عن بعض ما تتمني حدوثه خلال الفترات المقبلة؟

انا بقالي سنه بالظبط من اول ما دخلت مجال التصوير ومعايا نيكون 610d اول كاميراه في الفول فريم ، فنفسي احترف في استخدام والتعرف علي جميع شركات الكاميرات النيكون او الكانون او السوني ،لحد لما امسك اي كاميراه وابقي متمكن منها .

ونفسي بجد اثبت لنفسي وللناس اللي كانو بيقلولي مش هتوصل وضحكوا عليا او قللوا مني و قالوا البلد مليانه مصورين فمش محتاجاك ، اني هبقي مختلف وكمان كام سنه الناس دي هيبقو بيتشرفو بيا.

-كلمنا عن الشخصيات التي سبق لكل العمل لهم وكانوا دفعة تطور لك ، و بتتمني تعمل لتعمل شغل تصويري لمين غيرهم؟

انا صورت مشهورين تيك توك كتير زي هشام اتش وساندي واسراء احمد ودانا زوهدي ، ونفسي اوصل لليفل الممثلين يعني بتمني انشهر وانزل شغل لتصوير مشاهير عامة وممثلين في الوسط الفني .

اي النصيحة اللي حابب تنهي حوارنا بيها ؟

عايز بس اقول العمر مجرد رقم ، وان الطموح ملهاش علاقه بالسن ولا بالمكان اللي انت فيه ، يعني انا اهو عايش ف مدينه عاديه مش عايش ف القاهره ، فعلشان فكره التصوير عندي عموما مش مفهومه زي برا ف انا بحاول اثبت لأي حد اني اهو بقدر اتغلب وارفع من نفسي بنفسي ..

فمهما كنت انت فين وسنك قد اي خليك طموح وعافر علشان توصل ، انا بدأت من الصفر وبعده بسيطه لسا الحمد الله ربنا كرمني علشان عارف اني تعبت واني استغنيت عن حاجات كتير علشان التصوير.

وعايز اقول ان عشان كنت صغير ف اعدادي لسه لما فكرت احط هدفي قدامي فكان بيجي عليا ايام كتير وانا قاعد في اوضتي وافكر ف كلمة فوتوغرافر اللي كتبتها علي الحيطة واقول طيب هجيب الكاميرا هعمل اي ، كنت من كتر التفكير كعقليه واحد ف تانيه اعدادي عايز حاجه فلازم بقا اجيبها بس دي غالية و مفيش حاجه ف ايدي اني اقدر اجبها ، فغصب عني استنيت وصبرت وكنت بحاول احوش وساعات كنت بعيط كتير واصلي وادعي كتير ، والحمد الله ربنا استجاب لدعائي علشان دايما بحب الخير للكل والناس بتحبني فالحمد لله على كل حاجة ، فخليك دايما ماسك في حلمك حتي لو شايفه كبير عليك ،ادعي ربنا كتير وصلي واطلب اللي بتتمناه وهو هيتحقق لما تكون بتعمل اللي عليك وبتحاول .